ՄԻՊ-ն անթույլատրելի է համարում Հայաստանում կալանքի կիրառման պրակտիկան

Մարդու իրավունքների պաշտպան Անահիտ Մանասյանը միջազգային չափանիշների տեսանկյունից անթույլատրելի է համարում կալանքի կիրառման պրակտիկան Հայաստանում։

«Արմենպրես»-ի հաղորդմամբ՝ Ազգային ժողովում Մանասյանը նշել է, որ այս խնդիրն առաջին անգամ բարձրաձայնվել էր նախորդ տարի ՄԻՊ-ի տարեկան հաղորդման ժամանակ՝ որպես համակարգային բնույթի խիստ մտահոգիչ երևույթ։

«Նախորդ տարի հատուկ վերլուծություն էինք սկսել իրականացնել դատապարտյալների և կալանքի տակ գտնվող անձանց թվի առնչությամբ, և մեր հետազոտությունները, ուսումնասիրությունները ցույց էին տվել, որ Հայաստանում ազատությունից զրկված անձանց կեսից ավելին կալանքի տակ գտնվող անձինք էին, նույն արդյունքները շարունակում ենք ունենալ նաև այժմ, ինչը միջազգային չափանիշների տեսանկյունից անթույլատրելի է»,-հայտարարել է Մանասյանը։ 

ՄԻՊ-ի խոսքով՝ այս տարվա տարեկան հաղորդման համատեքստում ևս արձանագրում են, որ նախորդ տարում նշված խնդիրներն ամբողջությամբ լուծված չեն։