Թրամփը ժամանել է Աբու Դաբի

ԱՄՆ նախագահ Դոնալդ Թրամփի օդանավն էմիրաթական կործանիչների ուղեկցությամբ ժամանել է Արաբական Միացյալ Էմիրությունների մայրաքաղաք Աբու Դաբի։ «Արմենպրես»-ի փոխանցմամբ՝ այս մասին հայտնում է Աբու Դաբի հեռուստաալիքը։

محمد بن زايد يستقبل دونالد ترامب لدى وصوله إلى الإماراتhttps://t.co/Be4o0J4kj0#صحيفة_البيان pic.twitter.com/IujnjdgkLK

— صحيفة البيان (@AlBayanNews) May 15, 2025

Օդանավակայանում Թրամփին դիմավորել է ԱՄԷ նախագահ Մուհամմադ բին Զայիդ ալ-Նահյանը։ 

Թրամփին դիմավորել են ազգային երգ ու պարով։

Դիմավորման արարողությունից հետո երկու երկրների առաջնորդները զրույց են ունեցել, որից հետո օրակարգի համաձայն՝ Թրամփը մեկնել է  Շեյխ Զայիդի մեծ մզկիթ։

Առաջիկա ժամերի ընթացքում դիմավորման պաշտոնական արարողություն տեղի կունենա Կասր ալ-Ուատան նախագահական պալատում։

Այցի ընթացքում Թրամփը ներկա կգտնվի ԱՄԷ-ԱՄՆ տնտեսական ֆորումին, որին կմասնակցեն երկու կողմերի բիզնես առաջնորդներ։

Թրամփն իր այցը կամփոփի պաշտոնական ընթրիքով, որին կմասնակցեն երկու կողմից հայտնի անձինք։

Սա ԱՄՆ նախագահի առաջին այցն է ԱՄԷ 17 տարվա ընթացքում, իսկ նախագահի պաշտոնում՝ ընդհանրապես առաջին այցը։ Ըստ էմիրաթական հեռուստաալիքի՝ այս այցելությունը հաստատում է Արաբական Միացյալ Էմիրությունների և Ամերիկայի Միացյալ Նահանգների միջև ռազմավարական գործընկերության խորությունը և արտացոլում է համատեղ հանձնառությունը՝ խթանելու խաղաղությունը, ամրապնդելու անվտանգությունն ու բարգավաճումը տարածաշրջանում։

Մայիսի 15-ին ԱՄԷ այցով Դոնալդ Թրամփը կավարտի իր մերձավորարևելյան շրջագայությունը, որը ներառել է այցելություններ նաև Սաուդյան Արաբիա և Կատար։