Կան գործիքներ, որոնք կարող են օգնել ՀՀ դատավորների միությանը՝ խնդիրները լուծելու համար. Դատավորների միջազգային միության նախագահ

Կան արդյունավետ գործիքներ, որոնք կարող են օգնել ՀՀ դատավորների միությանն՝ իր առջև ծառացած խնդիրները լուծելու համար, առավել ևս: Կան նաև միջազգային չափանիշներ, որոնցով ճանաչվում են Մարդու հիմնարար իրավունքները։ 

«Արմենպրես»-ի հաղորդմամբ՝ այդ կարծիքը Երևանում կազմակերպված համաժողովում հայտնեց Դատավորների միջազգային միության նախագահ Դուրո Սեսան։

«Բոլոր երկրներում բոլոր քաղաքացիների համար սահմանված իրավունքների պաշտպանության խնդիրը վերաբերում է նաև դատավորներին։ Մեր միության գործունեությունը միտված է երաշխիքներ ապահովելուն, և այդ ճանապարհին սերտորեն համագործակցում ենք Դատավորների միջազգային միության անդամ երկրների հետ։ Առանց ազգային կազմակերպությունների ազատ արտահայտվելու իրավունքի՝ միջազգային ու եվրոպական կառույցները չեն կարող գոյություն ունենալ, քանի որ խոսքը մեկ միասնական և ընդհանուր իրավական ընտանիքի մասին է։ Դատավորները նույնպես պետք է ներկայացնեն իրենց շահերը, խթանեն ու ամրապնդեն դատական համակարգի անկախությունը»,- ասաց Դուրո Սեսան: 

Նրա պնդմամբ՝ նման միությունների գերնպատակը քաղաքացիների իրավունքների պաշտպանությունն է, ուստի այդ առաջնահերթությունն ամրագրված է նաև Դատավորների միջազգային խարտիայում։   

«Դատավորները պետք է անկաշկանդ խորհրդակցեն հատկապես օրենքների կիրառելիության հարցում, արդարադատության հետ կապված այլ հարցերում, որպեսզի կարողանան պաշտպանել նաև իրենց իրավաչափ շահերը՝ լինելով անկախ։ Դատավորների կարգավիճակին առնչվող եվրոպական խարտիայում նույնպես ամրագրված է այն թեզը, որ պետություններն ունեն երկու հիմնական պարտավորություններ. մեկն այն է, որ չպետք է միջամտեն դատական իշխանության գործերին և մասնագիտական կազմակերպությունների աշխատանքին, իսկ մյուսն այն է, որ պետք է ամեն ինչ անեն դատավորների իրավունքների իրացման առումով։ Մեր նման միությունները թշնամի չեն, ուստի չպետք է դիտարկվեն որպես հակառակորդ, և պետությունները պետք է զերծ մնան նրանց գործունեությունը սահմանափակող քայլերից»,- ասաց Դուրո Սեսան։ 

Նրա դիտարկմամբ՝ վերոհիշյալ իրավունքները հենց այնպես հասանելի չեն, ուստի շատ կարևոր է այն հանգամանքը, որ դատավորները պատրաստ են աշխատել հանուն արդարադատության, իսկ միջազգային դատական կազմակերպությունները պատրաստ են օգնել ազգային կառույցներին՝ նրանց առջև ծառացած խնդիրները լուծելու համար։